|
by Muhammad Anvar Amin recorded and translated by Richard F. Strand 10. |
by Muhammad Anvar Amin recorded and translated by Richard F. Strand 10. |
| imo je kâtoa˜ de, â·kü âska, nüštruk pâ·se˜ źâ˜vor de imoa lâTea˜ Suc kâřo. vâsut â·kiste˜, nire âmna quvâ ni nâmammiš_kti âmkioa˜ hu·kumât meS lot kâřo. lot kâřa to ca â·kiste˜ imo je âmkio˜ pâmüc, ina lâtri to bitifoqi oaso. šoa lot kea_kâřo kti i˜a âmkio˜_to pâpali☠ie sta bo nâ˜i â? lot imoa, šo de câli·siň, suara âmna kombřom mânša vâpali☠âćti i˜_to suara, imo sta ptul âša sta pâta bo u [?]. imo kuiu, kTol sâno bula nâ bo u [?] imo kâa_kummiš_kti, i˜_to vâpili☠oasâ i˜a gek düŋe lot kâřa·sa kti_gija_ku âska. â·kiste˜ i˜a gija_kâřo ina lot de, šo sta lot de o˜ qâbul nâ vo_âsam. ina de, Sâŋe de, šo gija_kunâsaň kâca ina hu·kumât meS vâllâa bo âska mânša mubådâm_âsa_kunâsaň. strak de kâca peGâmbâr oasta de Ti˜ć nâ bo suara šoa Gâlât kâřa·sa šoa hu·kumât to Tâŋa vřâkuta·sâ kti i˜a je âmkio˜ pâmüc, viri âska bo sâip? âmki nâ ni višanâsi âkiste. pâSuc. | |
| [R] kâca_âsi? âmkio˜ sta jeST. | |
| [A] âmkio˜ sta jeS mulo_âpźâl_âsi. âska vel to mulo_âpźâl_âsi, âska mulo_âpźâl de, âmkio˜ sta âmir_âsi; âska ˀubâidulo nom vo e xurzåbit_âsi âska, qumondon_âsi. â·kiste âmkioa˜, ina lâtri âmce˜ sta jeSvor carea sta bâlla. i˜a nire, â·ki šâŋir âsia˜. nâ˜i gâNür âsia˜ bâlla â? šâŋir âsia˜ bâlla â? i˜a nire_âsia˜, o˜ pâSuc_âsim â·ki niň. â·kiste˜, mânšoa˜ âri ienam o˜ć âmna nâřio i˜ sta pâTi to nâ bâra_oasâ âmnoa˜ kti mâSea˜ e vor o˜ mânšoa˜, ricât [?] nâmti, nâŋar oa·sim, egek to o˜š kunam bo â·ki âmna, jeS mi jeSToa˜ âćti o˜ vânmiom suara püň mânša ina, kâta caroa˜_gustâi; imo küře˜ suara io sta jeS vânmati io sta kudüm_kummiš_kti, âmnoa˜, bâřom o˜ć âkiste. nâ višanâsim â·ki o˜ nire i˜a, mânšoa˜ meS vodâ_kâřa·sa o˜ć ni ienam_kti. â·kiste âmki tâpol bâ âkiste o˜ć, mâjbur biti âmkio˜_to u âća˜ nâ bâti, pü gom âkiste. pü_giti, â·kiste i·a, lâtri, i˜a de purjik vilâ·i ca imo giti kombřom gomiš. giti kombřom, ou˜, â·kiste âvâl bâra_giti piti_gal ste˜ merořm gomiš âkiste. merořm, ina purjika vilâa·sa â? tu to nâ˜i â? | |
| [R] nâ˜i. | |
| [A] nâ vilâa·sa â? | |
| [R] nâ˜i nâ˜i nâ˜i. | |
| [A] nâ˜i o!. ina de gita sta bo nâ˜i â? imoa, kâmkuřoa˜ sta, tânsim küře˜ buna o; kâtoa˜ sta küře˜ buna ina lâTea˜, pâSuc âmna mânša bâbuaTe_giti nâ buna kti ca˜, âmkioa˜, âska_kâřo ca. â·kiste pü giti püre, piti_gal, âmkioa˜ dić trić_vos vâsaŋařati mânšoa˜ viri, špâa sta bâlla. ânvâra de, qumondon_kummo mulo rustum âska_kummo kti âska_kâřa sta bâlla bo âkiste˜ â·ki i˜_to âmkioa˜, ina viri vilâiom âkiste. nâ de_kâroa˜_gom, âkiste âmki=mânša xâ·pu bunâsi âkiste˜. i˜a âmkio˜ meS ina lâtri qâbul_kti ca˜ bâra giti merořm gomiš. kâmu vâsiomiš. giti kâmu vâsti kâmu vâňi di vâsaŋařeati sârtâňi di vâa oa·si âmna sunti giti merořm gomiš. merořm âska mulo_âźartâli, hu·kumât meS ni ie to˜_to i˜a, vina·si nâ˜i â? âska. Tâbea·si âska. â·kiste˜ âske sta totas to giti dâvo_kuň gom o˜ć. dâvo_kuň giti i˜a gija_kâřo, i·a, tu sta pütca de mâřa·sa, âska kâa mâřa·sala bo, âskea de o˜ nâ źâňanam. âska i˜a jâňi·sa, ou, i˜a nâ jâňi·sa bo i˜ sta mânšoa˜ jâňi·sa i˜ meS iela mânšoa˜, âskea tü bâkcanša â? nâ bâkcanša â kti kudeao i˜a. âska i˜ sta âaTi mře to˜_to i˜_to, vâ·siât_kti mâřa·sa kti gija_ku. â·ki âmu cat to â·ki âmki âaTia˜_to mujo·ita˜_to vâ·siât_kti mâřa·sa. i˜ sta mâra˜ målum nâ_âsa. o˜ć âduka mânša mâřa·salam â? STâla mânša mâřa·salam â, nâ˜i. [mâřa·sala â? nâ˜i m â? n...] nimal mânša mâřa·salam bo. imoa de hu·kumât meS lot, de imoa nâ_kâřa·si, eTa mânšoa˜ o˜, mišeati mu·Târ to pâňu_âTleati bâřom; suara pâput u vina·samiš ina i˜ sta, ina kitop to o˜š koř_âsa o˜ kâa kti [?] mřenâllam bo kti gija_kâřa·so âskea. â·kiste âska totas gija_ku, i˜ sta âaTi tu to dâvo nâ_kâřa·sa o˜ć, tu to kâa dâvo nâ vo_âsam kti gija_ku. â·kiste˜ â·kü âske to dâvo kti ca˜, â·kiste ca iemmo kti, kombřom enâsamiš egek to âkiste âmki merio, imo to gija_ku, [laugh] imoa de ina inqilop imoa ubajea·sa. imo suara, imo šoa, jeS nâ_kâřa·samiš imo nâ iemmiš kti gija_ku âkiste. i˜a gija_kâřâ i˜ sta ˀivâs to šo jeS buň kti gija_kâřâ. suara ina jeS vor to de, kâa viri_âsa bo; ina jeS vor i˜a šo ptoň. šo merio kua jeS vânmanaň bo o˜ć, ina viri to ter_âsam_kti gija_kâřâ âkiste. â·kiste nâ˜i. tu düŋe nâ gija_kummiš. i˜a gija_kâřo "i˜ düŋe nâ gija_kunaň bo ku düŋe de gija_kunaň ina Suc de o˜ kâroanam šoa. âska mulo rustum bicorâ de â·ki kombřom_âsa, âska de ina viria˜_to nâ_âsa. nâ de âska pâSuc iela_âsa. âska de âni šo meS mulo_âsala břâkom suara, ea˜, o˜ de i˜ sta viri to ter_âsam šoa pe utenam_kunam bo âkiste. di nâ_kâroa˜ ienâsi âkiste. e vor â·kiste sâip, âmkio˜_to, imoa mâSa_kâřo âkiste. sunti gřâmia˜ mâSa_kâřo šo de, imo to de nâ kudeaou˜ puta peTti giâ˜_mi suara, ina imo sta inqilop âska sâ·i, put to di šoa nâ pe utařo. strak di šo di nâ_kâroa˜ ienaň kti e vor âmkioa˜ mâSa_kâřa to âkiste˜, âmki âkiste˜ mâjbur bâ âkiste˜. imo meS sâniâ âkiste. dü vići moc merio di sâniâ âkiste giti kombřom gomiš o! ea âźor mânša giti kombřom vâsaŋařiomiš âkiste. | |
| kombřom vâsaŋařati ca â·kiste˜ di, mulo rustum_to gija_kâřa to âkiste˜ âska di, o˜, nâ bunam_kti mukio âkiste˜, kua [?] mukeâlla. mukea to ca â·kiste˜ imoa â·kü âska dâstikar jeS vânmi to â·küste˜ i˜a jeati ca˜ tâškilot i·peao âr gřoma˜ sta. küře˜ küře˜ gřoma˜_to suara, ura vânmio, küře˜ gřoma˜_to suara jeS vânmiâ. küře˜ gřoma˜_to mujo·ida˜ sta suntia˜ sta, âska, i·a lâtri i·peao. nom i·peaâ ca˜, egek mânša mujohid bâ kti. imoa tâqribân â·ki, dü dü nim âźor mujo·it_âsamiš. | |
| [R] šo âźor. | |
| [A] nâ nâ˜i. šo_âźor. oakuNi_âźor. oakuNi_âźor dü nim âźor mujo·id_âsamiš imo. â·kiste˜ âmki i·peati ca˜, vor vor to, vor vor to, ielâ_kâřâ âkiste. â·kiste i˜a de giti nire â·ki uštroT, niruk u âska bârgü_gul nâ_âsa â? â·kü je sta bo, qumondoni â·kü i·peao. â·küste ca âmki vor vor to vâlleati sâip, e bâTa mânšoa˜ de, kuN nâmti, e bâTa mânšoa˜ nire nire â·ki gâNür nâmti, e bâTa mânšoa˜ suara â·kü, ina, lânDei sin, ina, bâdi·oa_pâpiT. â·kü ni_kâćeati ca˜, quvâ nire â·ki jena·si nâ˜i â? âmna gita kti i·peaâ âkiste. i·peati âmkio˜ sta âmki jeS de vilâiâ ca suara, šo sta nubât, âr gřoma˜_to, âmna šo sta, vor_âsa. ina vor to suara io sta vora ketta mânšea nâ punrea bo, âska suara Su go Den_âsa o suara kti, âmki pâTia˜ âr gřoma˜_to pâTi, nâmti ca˜, mâktup_ptâ âkiste. | |
| â·kiste˜ ina jâhot gita sta šâ·kal to dâvom_âsi nâ˜i â? o˜ć â·kiste˜ ketta to˜_to, kuiu giti, âmkio˜_to âtam oaźalom bo, o˜ i˜ sta šü˜ nâ vilânâsim ca o˜ć kuiu ienam_kti. âska o˜ kuiu vik ketta gřom_to gum_to ketta to˜_to vâsim_to â·ki kuiu âar ste Su přoala bâlla bo. řâdor di gâjâr di âćti â·kiste˜ â·ki bâmbort kunâsi. ü teti [?] vianâsi. kuiu_âta pšol vâsim_to âćti â·ki vianâsi! âska gi☠viala_âsi bo de kâi dâvâr [?] e vor âmki tâiorâa˜ âveti sâip âmna lâtri, turći˜ turći˜ mâin nâ˜i â? âmna. kür peTli. âmki lâtria˜ ü_âTleati bâraň ptula˜_to je âmki=źâŋgâla˜_to. e vor âkiste˜ âćti ca˜ âska ketta pšol to bim_to âskoa vianâsi. mânša jeati âćla bâlla â? â·ki i·a, âmkioa˜, źâňala mânšea, âvela bâlla â? o˜ć, Der bi·sam i·a viri to. âtre mânša pâido_kâřa·si nâ˜i â? âmkioa˜ nüštruk quvâ ni ie to˜_to â·ki mânša, âmkioa˜ břâkom mânša pâido_kâřa·si, Tâŋa přeti. [end of tape] i˜a â·ki nâ_âsia˜ âmki i·a hu·kumât â·ki biliuk kudüm kâřa sta bâlla o˜ de âni pi·šâvur bâra oaźti oasom âni bâkul [?] vâlleaom nâ˜i â? â·ki âmki ina jârgâ ca iemmiš â jârgâ ni âćammiš_kti sâip, â·ki âtaň âmce˜ sta mânšoa˜ pâido kti ca sâip âmki, âmkioa˜ kudüm_kâřa sta bâlla ne? višanam o˜ć âkiste. | |
| [R] kâca målum âi â? | |
| [A] mânša de gek_kti målum âi ca â·ki eTa mânša, â·ki ni âćti, hu·kumât to ni iela mânša målum âi i˜a drea vânmiâ âmki mânša. | |
| â·kiste˜, o˜ć âni ste˜ âta ienam bo â·ki de hu·kumât meS mânšoa˜ lot_kâřa·sa kti vilâ... âmki vilâa·sim nâ˜i â? kâca mânša, âsala mi [?] višti_âmkioa˜ küt kunam bo sâip âmna, eTa mânša â·ki ni gustâi âkiste. ni giti â·kiste âmkioa˜ lâtri ca ptastâa, ca âvařastâa, care de lâtri bâTa_kâřa·sâ, pâCCeć sâtić lâk Tâŋa vřâkâti sâip âmkioa˜ pâare kStořm, e dü tre_küř, kStořm, mânša âi; e dü tre kâta âi; e tre što_küř pâňure kombřom âaTi âi. âmkio˜ pâmüc suara ina, e de ina, ina dâ·ut nüške˜ i˜a nom_tâřo nâ˜i â? ea de i·a_âsa. suara, e tre što de vâre ea di e [?] Gulom râbi_kunta â·ki ürbřom źâňanša â? e lâtri. ea de âska_âsa, âske sta břos. sadiq. âskea nom_tenâsi suara, âmna ketta mânša ca utina sta=âsi [?] bo nâ˜i â? âmna kâta_gal ca iela mânša_âsi bo. âmna mânšoa˜, pâňu giti ca ina kudüm nâši·sa â·ki. imo, suara hu·kumât meS lot kummiš_kti â·ki âmkio˜_to Tâŋoa˜ vřâkâti âkiste vâa_âćti mânšoa˜_to gija_kti, hu·kumât gija_kuna, ea˜ âska, hu·kumât sta STâla_viri de mânša nâ vilâastâi ca. hu·kumât gija_kuna o˜ ni ienam i˜a ni uteň suara kâa lâtri šo vřâkânaň bo vřâkânam; âmkioa˜ de šoa přenam_kti TüTü přela_âsa nâ˜i â? âmki âćti mujo·idin_to kâa mâNanta hu·kumât gija_kuna o˜ de ni ienam_kuna fâqât i˜a e nu duć, donâ tâpka gâćaň, o˜ć â·ki tâpka vřâkâti oasom mânšoa˜ tâpka ü tâřâ, kunam, âa, kuna kti, âmkio˜_to mânša, mânša kâca tâpka přenâsi? mânša de nâ přenâsi! | |
| suara mânšoa˜ gija_kâřastâi âkiste, âmki mujo·idina˜ mulo, mulo šâm·sulo, lesta takrâ mulo_âsa. âska mujo·it di_âsa. âskea gija_kâřastâi kâca šo lot kula_âsaň bo šo lot_kšaň; o˜ de ina lot, nâ_kula_âsam_kti ca suara, âska nuksati âćti âmu sta âaTi meS âćti âgâći oaso! ina lot viri to. â·kiste âgâći âćti ca˜, â·kiste eTa mu·Târ ninša ieloa˜_to vićâ puc mu·Târ ea gâjâr âmkioa˜ viati sâip, ü˜_jeati sâip, âmki kâabo, pe târeati tâpka di puNrik di sunti pe târea·sâ âmkioa˜. â·kiste˜ âmkioa˜, bâTa kti ca˜, ni âćti âkiste˜ merořm oa·sâ sâip. merořm âćti sâip merořm quvâ de via to˜_to sâip â·kiste˜ ina lot pâmüc, âtajbâra giti âmna Tâŋa vřâkâla mânša kâca âi? âmna dâ·ut kila řâdor lâ·Tin pâ·šeati ninša lâsti sâip âmki âska, mujo·idina˜ sta prugrom di nâši·so âmkioa˜; â·kiste ca˜, strak pâřuckol â·kiste si [?] o˜ de nire vü târi sta âmkioa˜, âmnoa˜ Ti˜c nâ_âsam! âmce˜ de lot_kti suara quvâ ni gâanta! o˜ nire ni âćti strak mâNragal jena·sam sâip, â·ki mâNragal, i˜_to ni nsi to sâip ca, â·ki viati âska âźartâli tâpea·si nâ˜i â? | |
| â·küste sâip imoa je âmna mânšoa˜ pâmüc, âmna kâta·gal břo de ca utinâ; imo ni utinomiš. kâta_gal břo âmki=âkiste io sta, tânsim meS, mulo âpźâl, de jeS_kti ca [?] suara, qumondon ˀubâidulo mi vânmati, âmki de, gek_kti ni ie sta bo. imoa je âmkio˜ sta âkiste˜ nire â·ki, ina, bâřasgiro niSo. bâdi·oa pâa_giti pâaruk u bâřasgiro nâ_âsa â? âska bokcâ to u˜. â·kü âkiste sâŋgâr i·peati ca˜, âmkio˜ sta di imo sta di âaTi â·ki, lâTea˜ jela bâ âkiste. i˜a â·kiste˜ i˜ sta mujo·idina˜ gi☠küře˜ küře˜ ânü jeati de nâ buna ina lâtri břâźa niň gâati niň poar, koT kâřa bo ina put, peTti, ina berkuT, âskarvor, kâřa bo kti ca˜, i˜a gâati nire_vik, gâNür camak jeao! âaTi. i˜a de â·kiste dârâ e sin gu sta âmna dârâ e sin sta kâca imo sta totbřo mânša bulâ pere, šâŋir vâňi bulâ, gâNürio bulâ, suara âmna, âmna mânša de i˜a i˜ meS vâsařeaâ nâ˜i â? i˜ sta jâbâ to âmki de âta oasâ imo de tu meS jâhot kummiš_kti. biliuk mânša sin dârâ mânša i˜ meS sâniâ âkiste. â·kiste i˜ sta jâbâ biliuk oala bo âkiste. | |
| â·kiste˜, jâhot â·kü kuna de [?] mi de `ca dâfâ imoa, imo sta mânšoa˜, berkuT âmlâ_kâřo. biliuk, sâxta sâxta=kti âmlâ_kâřâ. [end] |