|
by Muhammad Anvar Amin recorded and translated by Richard F. Strand 9. |
by Muhammad Anvar Amin recorded and translated by Richard F. Strand 9. |
| nuriston mânšoa˜, je hu·kumâta, nüštruk, pâ·se˜ imoa Suc kâřa to âkiste˜, pâmüc u âska [?] lot kâřo, mânšoa˜. imo e_sâma mânša di câlti pü târiomiš, ku sta gřom luSi·sâ bo, ku sta, kâca âska_âsâ bo. kâca tuare˜ hu·kumâta liSTati bâdüšt ela_âsamiš bo. imo io pâvidařika˜ suara âmna, pâcogula˜ gřom_to ste˜ mânša pü târeaâ. püň pü târeaâ. eTa mânša kombřom sta de pü târeaomiš. eTa suara, kombřom ste˜ giti kâtakal poar mohâjar bâ. ca pilŋiti giti. imo˜ je kâta břoa˜ fâi·salâ_kâřo ca, ina buTi iu to˜_to kâtakal ste˜ âve˜ nâ bânâsi nâ˜i â? imoa âmkio˜_to gija_kâřâ ina niň âni nire, kombřom nima dunio to, šo, caň ste˜ jâhot to ni oasaň bo. buTi, imo niň mânša šoa přemmo. ina lâtri â·küste˜ ca târi bo, â·kiste˜ caň šo buTi přeloň. kti imoa je âmkioa˜ dâvo_kâřo ina. â·kiste sâip âmki imoa, ina dü mos, â·kü nimak, imoa kombřom nimak [?] Suc_âsi. sunti imo sâip, hâr gřoma˜_to sâip, buTi, bâtor, kilâř, Sâřa, âSe, âmnoa˜ âveti sâip, biliuk sâxta kti mâiâ sâip. ea˜ vâre imo to ste˜ âmnoa˜ gi☠mi hu·kumât gâana io, vř☠ŋâla bi, hu·kumâta koT bi bo âmnoa˜ de imo to nâ nâcoana, kti imoa âska_kâřo nâ˜i â? â·kiste˜ âmkioa˜ âveti imo biliuk lesta kti so tâřâ sâip. | |
| â·kiste˜ ina hu·kumât imo to puNrik xâlos biti ca ca ca lâsio âkiste˜, o˜ di, nâ bom âkiste˜ i˜a, o˜ püň gom âkiste˜, â·kiste sâip ina hu·kumât gek_kum giti ca lâsti giti sâip, kombřom pâřio! kombřom přeati ca sâip mânšoa˜ âkiste˜, mâjbur biti sâip âmki pâta bi mânša kâca_âsâ bo âmki, kombřom mânša sâip, âmki giti, kâtakal, mohâjar bâ âkiste. kâtakal âkiste˜ âmkioa˜ lesta âska kâtoa˜ sta viri_âsa lea kti [xx] sâip. âmki lesta kti Tâkiâ višâlla bo sâip, tre_kâše˜ řoa sâip imo to, e vâsa_kâřo sâip. tre_kâše˜ řoa. ea vâsa kti vře˜c kâřo. puc juvor, puc juvor nâ_kunta_â? puc tića juvor, ea go_kâřo. ea vâse muři ius; ea go_kâřo. mânšoa˜_to go, gu kâca go mâca [?] gu·si bo âmki. xo âmkioa˜ [xx] imo meS [xx] imoa kâa âmce˜ meS kâřa·si bo âskea ku˜ nâ bâiâ imo meS. nâ_ku˜ bâa to mânša mâjbur bâ ne? | |
| âkiste˜ âmki, âska źâ˜vora [?] sâip, kür luSTati düš luSTati sâip, care, fâur bâdo târti sâip, mânša giti, Cânrol [xx]. źâ˜vor. ou˜. i·a tâklifa ca˜, hec, di nâ dunio to tårix to i·a gita sta, tâklif mânšoa˜_to Du bi·sa! nâ gita sta mohâjarât mânšoa˜ kâřa·sa. nâ i·a tâklifa kâca qâbul kunta_o. mřela bi bo di kâca qâbul nâ_kunta mâgâr âmki imo mânšoa˜ qâbul kâřo i·a lâtri! biliuk tâklif so [?] târiâ, bâdo. biliuk mânšoa˜_to düš luSa˜_guâ, kür luSa˜_guâ, pârmaň mâřâ sâip, pâši_âtam mâřâ sâip, jukuř mâřâ sâip pâput u sâip. purduk mâřâ sâip. go_Sâřa sâip pâ·kât vâvići xâdâm [?] dâdü vići xâdâm_to sâip go_Sâřa sâip kTol u [xx] gu·sa, mâřâ. mâřa sta kâca âmkioa˜ âlol kti â·kü âTleaâ, âTloanâsi. âmki, ânobâTa [xx] kâca nâ ŋânâsi! kâca ca˜, pTipâara, iâio přoala kâca pâput u, âmkioa˜ vř☠kSeati kuiu ko pâca˜ bâti iunâsi bo pâcanâsi nâabo suara â·kü âsi. i·ea, mânšoa˜ ŋe pâput iâš, hâr [?] to˜_to tâior_âsi. [laugh] i·a gita sta šâ·kal tâklif meS sâip imo sta mânšoa˜, mohâjarât kâřo. | |
| xo, i·a, mohâjarât de, i˜a nüške˜ di vilâioš ina Sâŋe, kâmkuřoa˜ sta mohâjarât di vilâioš [?] nâ˜i â? biliuk tâklif meS suara gřom luSiâ; bâźgal; uštroT; pitikal; kâmu; merořm; âmna sunti luSiâ sâip. [xx] to mânša püma_guâ, püma gu to, eTa de ca_pilŋiri go; eTa pü_pilŋiti gomiš o! dü bâTa bomiš mânša. | |
| dü bâTa bimiš to âmna `ca târloa˜ de, STâlea˜ ni âćti quvâ kombřom ni_Tiki·si, mumořma jâbâ vânmati ni âćti kombřom, âtam oaźti, Suc kunâsi. âgâći poar, pTipâar poar âta, âgâći, â·ki âtam oaźanâsi merořm, niň, sâret niSo, toa, i·âar, bâdo târti ina, pere, pere u do nâ_âsa_â? pere u do to bâdo târti giti sâip merořm bâkul bâra_âćti Suc kunâsi âaTi. â·kiste˜ âćti sâip sâret bâdo bâra_âćti sâip, Suc kunâsi. pâput ninša ieloa˜ vianâsi âmki mânša. imo pü târi mânšoa˜ sâip, âćti sâip, âkiste˜, nire, ina lâmaroT poar, ni âćti sâip, pe târti ina pere bâdi·oa peň poar nâ_âsa_â? â·kü ninša sâip, care mânrakal ninša sâip care â·ki [xx], âmnoa˜_to, Suc kunâsamiš. âska nüštruk źâ˜vor. âska âvâl imoa, ina, Suc ubajea źâ˜vor. | |
| â·kiste ina, âska gek kum giti âmki giti giti [?] ca_Tiki to sâip, ca˜ mânšoa˜ âkiste˜ mohâjarât_kti sâip, âmki caň sta de caň pâta bo; püň sta püň pâta bomiš o! imoa püň âsia˜ sâip, o˜ć â·kiste˜, püň ste vâlleati, âni bâra_oasom nâ˜i â? o˜ć âni bâra oasam_to sâip âmki hu·kumâta Ti˜c bo ca âska âni imo ketta biliuk tâHrik kula mânša_âsi bo âska de âni nâ_âsa. suara ea dü kâca mânša âi bo de âmkioa˜ imo pâtioammo višiâlla_â? suara, nâabo de i˜_to lesta tâk â tâk â mânša_âsi â·ki ulâmo âsi suara, cizi jeS mi jeS di_âsi mâgâr, i˜a dü mos â·ki jâbâ to_âsia˜ sâip, âmki, lâder nâma˜ nâ dreaâ. nâ ˀuzar ku˜ dreaâ nâ kua vidařoa˜ dreaâ nâ kâi, qâttân âmkio˜ sta jârgâ tuare˜ nâ oasâ. ânvâr gu·sa kti âmkioa˜ Su bi to sâip ca˜ e vor âkiste˜, jârgâ sâip âmkioa˜, qâtor kâřâ sâip. kobul ste˜ di mânša vâlleati, âmki mânša, i˜ sta de qotri [?] âska_âsi. kâca jârgâ âćla mânša, vâ [?] âćti giTa sta bulo, âska giTti, di â·ki nâ utea sta bulo âska hu·kumât to. i˜ sta ina fi·kar_âsi. | |
| gek düŋe âmki â·kiste˜ â·ki ni gu to cuk imoa, lea źâňala mânša_âsi bo de âmki âkiste hu·kumât to lea vor emmiš_kti imo sta viria vilânâsi. âmna puNrik nâ vo âi; tâpka nâ vo âi; nâ â·ki can_âsa nâ âmeri·ko_âsa šo gi☠vidaři·saň kti. nâabo âska hu·kumât biliuk vidaři·si âska [xx]. sâxta kti âska, âska jak Turân o˜ vilâ·sim! i·e to âkiste sâip â·kü care ... | |
| [R] ketta jak Turân. | |
| [A] âska, e pâGmâni jak turân_âsi âbdurâmon nom_âsi. nire, sârhâdor_âsi. berkuT. âska i˜a nire â·ki, mânragal Suc to sâip, pe teti viati sâip â·ki i˜a âska, šü˜ vo vânmati ve târeao. âska purjik de i˜a kâři tu to. âska sâip â·kiste˜, âmna caň mânšoa˜_to jârgâ šuru_kâřa to sâip, jârgâ pâmüc â·kiste, eTa mânšoa˜ sâip, biimoni kti sâip, Tâŋa vřâkâti, ina lâtri qâbul kâřâlla. koma˜. koma˜ di âi, kâta di âi. pâare kSto di âi. tre qi·sam mânšoa˜ sâip â·ki cütke˜ lâder, pâare kStořm sta mânšoa˜ vâňati nâ˜i â? mânša âmki kâta, kâtakal sta di giti kStořm gustâi; kombřom sta di âćti â·ki oastâi; mumořm ste. jâbâ mumořm_âsa nâ˜i â? mujâ·idina˜ sta jâbâ de mumořm_âsa; suaroa˜ sta kombřom_âsa. â·kiste sâip â·ki, jârgâ ninša giti sâip kâca kobul ste mânšoa˜ vâlleati sâip, âmki jârgâ ninša giti, mânša pâido_kâřâlla âmkioa˜ nâ˜i â? | |
| [R] kâca? | |
| [A] mânša pâido_kâřa sta, vilâlom! ne. âmkioa˜, nâ vilâti de kâa di bulom âmkioa˜ tårixi guno_kâřa·sa, suara âska vel to i·a mulo âpzâl â·ki vel to mi dâvo_kunâsi ca o˜ć âni, bâraň, âmna mânšoa˜, âmir, nom_tâřa·sam_kti. âska, i·a dâvo vo_âsi nâ˜i â? âu, i·a ˀubâidulo nom vo nâ_âsa_â? e xurzåbit_âsi, âska qumândon_kâřa·si âmna kâtoa˜. âmnoa˜ sta ina jeSvor pâküř sâip, e ca mânša kSto âi kâca âi bo. e ca moc kombřom sta âi, e ca moc kâtakal sta âi. âmnoa˜, âni ina, lâtri to nom_tenam bo de ina, e tårixi xijolât_âsa âmkio˜ düŋe, mum·kin âmkioa˜ nâ źâňati ina kudüm_kâřa·sala. nom de nâ telom; mâgâr âmki mânša âkiste˜ sunti kâmkuř źâňanta âmkioa˜. | |
| âmki mânšoa˜ sâip â·ki sâtić lâk Tâŋa vřâkuta·sâ. âmkioa˜ sâtić lâk Tânoa˜ vřâkâti ca jârgâ biti ca, hu·kumât, biqâid i šâk ni ienam_kuna suara, lot_kti, kti giti pâtioanta mânšoa˜ nâ˜i â? | |
| hu·kumât de xut [xx], imoa, biliuk kudüm_kâřa·si niň. imo bâraň giti âmki Seć moc âmki jeST, nâmi stoa˜ je, i˜a je, âmki, i·a šo voli e imo bâra gu·samiš nâ˜i â? imo bâre nire pâriS sta jeS mi jeS vâlleati dâŋgom bâkul sta mânša vâlleati sâip, âSTić mânšoa˜ meS i˜a pere mârdon quron_kâřo sâip, e muSala mâti, i˜a âmki vâlleati â·ki âska_kâřâ sâip. âmkio˜_to i˜a gija_kâřâ ina ˀi·slom sta Suc_âsa; šo dâlke˜ gâjâr, šârmoa˜ ieloň; šo ina lâtri to imo sta puštivoni kšaň kti âmkio˜_to gija_kâřa to sâip, âmki mânšoa˜ i˜ sta viri ŋuto sâip â·ki. âmki giti gija_ku imo strak dâfâ giti â·ki, ina hâmlâ kummiš ina hu·kumât to. imo puNrik nâ vo_âsamiš kti gija_ku. i˜a âćti âni, âska vel to ina mujâdidi âni pâido bi·si. ina mujâdidi to sâip, â·ki tâqribân, Su_âźora [?] donâ de puNrik vřâkutâ; dü vićâ duć donâ bâm sâip âni âtre dârâ, Tâŋa přeti sâip mukeati [?] sâip, âmki oakuNi i˜a ruqsât kâřâ. šo giti pâpali☠ieň â·ki. niň poar. i˜a gek düŋe pâpali☠âšiâ âmki niň poar, âmki niň pâpaliâ˜_gu bo âni niň poar šaTe˜ mânša âi. sâlorzi [?] âi mumânD âi kâca kâca mâmund âi nâ˜i â? âmna pâpaliâ˜_gu bo caň ste ecok břâźa nima âćlo kti. âni ina břâźa niň poar pâta bulo kti sâip, âmki i˜a âska_kâřâ. | |
| âmki jârgâa˜ pâmüc âmki eTa fâistâlâp [?] kunâsi â·ki suara, dâŋgom sta e mâlak_âsa âska [?] i˜_to gija_ku, imo pâmüc ina jârgâ to e xâlqi di_âsi ina xâlqia kâa_kummo kti gija_ku. ina imo sta viria˜ â·ki gâana kti gija_ku. i˜a gija_kâřo i·a xâlqia de âve kti gija_kâřâ, i·ea imo meS quron_kâroammo kti gija_kâřâ. âska de quron_kâřa stea, âmki, quron_kâřa bo de i·a viria de â·ki gâana ca. o˜ de gâale to kušol_âsam, [?] âmki de viri nâ bâra iele to kušol_âsi nâ˜i â? o˜ć ina viri bâřa bo [xx] kušol_âsim ca âska â·ki quron_kâřo kti i·a hu·kumât vilâa bo! i·a ina âmu sta quvâ caň ste nuksoana âni niň poar i˜_to, tâklif buna višti sâip, i˜a âska xâlqi di vâlleao âkiste. xâlqia de quron_kâreati sâip âmki Seć mânšoa˜ i˜ meS quron_kâřo sâip. imo giti strak dâfâ imo sta qom u teati, pâpali☠iemmiš. | |
| âmkioa˜ de, lå hârâ·kât nâ_kâřa·sa ca ina mâmâd zârin, nâ_âsa_â? strak e mâmâd zârin_kunta âni e, qumândon_âsa. e ma·šuâNi. ina ma·šuâNi vâ·kil, kiloa˜ sta âska jârgâ meS sâip, pârea, ina subhâ sârhât âni, âmna, sârhâda˜_to pilŋi·so âska. o˜ć, šo sta si·po·i_âsam ina lâtri to, šo meS bunam_kti. âskea â·kiste˜, âtre â·ki mâior e to˜ u, âgař nâmoc to vâsaŋaňati sâip, vâ·kil â·ki u tiati vilâa·sa "ea, oakuNia˜_so. imo, Sâŋe šoa liSTati musalmon_kâřomiš. âgâr ina imo musalmon biti Dâkara bi·sa bo kâa de ina quron, imo sta küře˜_âsa bo de. imo sta, šo ine to imso kšaň ca˜ ina imo sta nâ_âsa kti. nâ˜i ina imo je šo sta lâTea˜ ea quron_âsa bo, ina quron sta duš·mân oa·sa bo, suara ina lâtri to šo vâňoaň imo to ina lâtri to, pâSuc âćaň_kâřa to, moamât zârin nom vo mânšea u_kâćeati puc por tâpka bâru_kâřastâi. oakuNi cor vo âi. uň_kâćeati puc por tâpka bâru teti ina kudüm_to ea o˜ć_âsam_kti u tina·sa âkiste. | |
| â·kiste âskea sâip tre što puc mânšoa˜ meS giti, pâriS âtam oaźti sâip e dü tre de âskâr jâňiâ âskea; e dü tre tâpkoa˜ vř☠ŋâti oaso. â·küste âmna oakuNia˜ de tâpka je lâtri vâňi bo, â·ki io sta šü˜ de šâ·it kunta sâip ca! â·kiste âmna nuristonia˜_to biliuk lâtri, bâdüš gustâi, âmnoa˜ tâpka vř☠ŋuta·stâi hu·kumât to. ina hu·kumât nâ droala mi višik, bunta, višiâ nâ˜i â? â·sli ina_âsi ca â·ki źâra vřâkâna ne. â·kiste sâip âmki mânšoa˜ u tiati sâip giti, ina, niň poar ina, gâTvâTi ubajeaâ nâ˜i â? | |
| gâTvâTi ubajea to hu·kumât to sâudo [?] pâido bo ina lâtri. ina lâtri, ina imoa, ina gestuk, kombřom ca_Tikaň vik âkiste˜ âskea â·ki jå·sus di pâido_kâřâ nâ˜i â? jârgâ ca ni nâmti ca nâmti mânša pâido bâ [?]. lâtri ptâ. âskea Ti˜c bo ca "oho, âni de nâ can_âsa nâ de âmeri·ko_âsa nâ de kâca âi. sirf âni âska ea mânša âi ina egek, imo vidařea·samiš. o˜ć â·kiste˜ dâm bâ dâm â·ki pâTia˜ di přenâsim ca, šo pe utela nâ_âsamiš imo to, dunio sta, pârea musalmon imo meS vâri_âi. vâlâkâ šo pe utelom bo tâslim nâ biň bo, ina hu·kumât, ina ea mos to âtaň âtaň ine, ni gâati jâllobot vâsaŋařoammiš_kti âmki tâbliGot kunâsi imo, mânšoa˜_to di. | |
| o âmna lâtria˜_to sâip âska vidaři sta bâlla bo sâip â·kiste˜ drea ca âćti imo sta tuare˜ ste˜ hol vâňati ca âkiste quvâ nuksoa ste to, bo nâ˜i â? quvâ nuksoa to˜_to ca˜ â·kiste˜ pâmüc u âkiste˜ o˜ přeati sâip, nire i˜a [xx] âźartâli de Tâbeao_â? [?] utro ina kâia˜ de o˜š nâ_kunâso kti âkiste ecok di vidařa sta bo âmkioa˜ i˜_to sâip. ina âmu mânšoa˜ di vianâso suaroa˜ di vianâso di uto. egek to sâip, âskea ina [?] lot pânoma sâip âki, âmna mumořm i˜ sta Gi·åbât to, i˜a âni pi·šâvur_âsia˜; â·ki mânša pâido kti; lot kunta_o! strak. âska lot viri to o˜ć âni âmki dü mânšoa˜ âni vilâiom nâ [xx] âmki puli·sa [?] vâlleati. âmki mânšoa˜ vilâim_to â·ki mânša lot kunta kti o˜ć âta gom. âta giti pü enam bo lot sâ·i kâřa·so mânšoa˜. lot kâa_kâřa·so âmna gita sta âmna gü kTol muloa˜ sâip, nâ źâňati, âmce˜ sta nâ źâňa˜ vor to, pâmüc eTa, gü kTola˜, io sta kTol štâňa, mânšoa˜ sâip, pâpali☠giti sâip, âska hu·kumât to Tâŋa vřâkâti, i·a hu·kumâta, ni utemmiš_kti ca, lot_kti âska_kâřa·so. i˜a âmki mânšoa˜_to gija_kâřâ âkiste˜. i·a jârgâ âćla mânšoa˜_to imoa de lot kâřa·sa tü kea, nâšanša inea, imo sta lot nâ nâšu. i˜_to ˀusar kunâsi. i˜a gija_kâřâ utrajaa˜_so! šo lot kâa kti_kâřa·sa. tre mos pânüškuň de šoa, ina kâ·para_âsi. mulhet_âsa, kâmunisam_âsa_kunâsaň. ina tre mos_pTipâar šo to ketta pegâmbâr gija_kuna strak ca, ine meS lot_kšaň, Suc ca [?], râvo nâ_âsa kti. šo to âgâr kua, hu·kum_kâřa·sa bo, âska pâigâmbâr sta nom_teň kti gija_kâřâi [?]. imo sta din_to de pâigâmbâr åxir zâmon xâlos bi·sa. di vâre pâigâmbâr âćla nâ_âi. ea˜ šo to de strak e vâre pâigâmbâr oa·sa âni šo to ina lot ku sta bi·sa bo. care sâret niSo pâsü u sâip, e vor âmna mânšoa˜ bâra gâati, o˜ bâra kti pe nâmanam â? pâSuc. nâ pe višinta sâip. dućći mânšoa˜ bâra gâanam, di mukanta i˜_to, dućći di bâra gâanam di mukanta. åxer i˜a gija_kâřâ o˜ hu·kumât meS lot kunam kti gija_kâřâ. ina jâhot to de mânša muki bo pTipâar kor puNrik přâpti bo âska luSa sta, â, sâTa sta nâ_âsa. šo de âni bâra giti pâsü bâra_Tikanaň [?], e mânša di mukanaň, di pâsü bâra_Tikanaň [?], di püs bunaň o˜ć ina gija bo hu·kumât meS kunam i˜ sta bâksea_âveň kti o˜ pâTi stroanam hu·kumât to. imoa xâto bi·samiš; mânšoa˜ mišea·samiš; imoa bâkcu_kunam. [xx] tre muloa˜ sâip, ea mulo šar gul kunâsi přâsü˜. ea mulo âbdal hâi. ea, care šüdgül e mulo_âsi, xudâa bâkcalo drea šâ·it bo. mulo hu·sen_kunâsi. âmnoa˜ trea˜ nubât to pâňu_giti viri vâllâiâ suara, ketta mânša ina dâHri hu·kumât meS viri vâllâ bo, âska jâňa sta mubohâdâm_âsa. âska râvo_âsa kti gija_ku. â·ki de âmki muloa˜ gita sta viri vâllâiâ nâ˜i â? [xx] meS vâllâiâ [?] kti gija_ku. e˜ strak âska ketta, dü buli, šo to âska pâigâmbâr ketta oa·sa kti gija_kâřâ. strak âska [xx] šo to åxeri pâigâmbâr âćla ketta_âsa. âske sta nom vilâň_kunâi [?]. ou˜. ketta âiot âvaři·sa âskea uň [xx] üň, ko âskoa vilaň. kâřa to [?] âmki hâiron bâ âkiste. kâa mâNanša, [xx] imo tu to viri kudoaň oa·samiš_kti gija_ku. egek to u, mulo âbdal hâi u tiati sâip, tubo_kâřo sâip. uštroT nâmoc âmo to. ou˜. kârmaTia˜_to vânmati tubo_kâřo. âmkioa˜ tubo_kâřa to sâip â·kiste ina, lot sta mâ·sâlâ to, i˜a, tâxir kor bo ina lot kâa šâ·kal to bi·sa kti nâ˜i â? âmki jârgâ_to i˜a âkiste gija_kâřâ suara, ina lot kâa kti bi·sa kti gija_kâřâ i˜a. imoa de dü mânšoa˜ lot nâ_âsa ca˜, e dü mânša âmkioa˜ lot kâroalâ. cütke˜ gâati e pur âmo to âta jeati lot kâroalâ! âfGoniston je nuristona Suc_âsi. âu, pâpućći [xx] to imo je, âske sta jâbâ_âsi. noša totša_kârek giti Dâkara viri i·âar [?] enâsamiš. tü urus pütras, imo_kunâsamiš; tü âŋlisa˜_kuř, imo, to âmki_kunâsi! ina strak šoa lot kâřa·sa, šo nâTü bi·siň â? nâ˜i âska hu·kumât nâTü bi·sa_â. ina lot viri šo to kettoa˜ peš·ni·ot kâřa·si šo kâřo nâ˜i. hu·kumâta_kâřâ. o˜_kša âa? o˜ šo to gija_kunam, ca šo eTa mânšoa˜ Câa vřâkutastâi; Câa vřâkâti ina hu·kumât meS lot kâřa·sa. šo cütke˜, qoum meS xi·ânât kâřa·sa, din meS xi·ânât kâřa·sa. din meS xi·ânât kâřa·sa bo, ˀi·slom meS xi·onât kâřa·sa, kti gija_kâřâ, âmkio˜_to. âgâr šo gija_kunaň bo suara imoa lot kâřa·sa_kunaň bo; bes lot sta pâTia˜ i˜a gâćaň; lot o˜ć o˜š kulom, šo lot kâřa sta bi bo âske to o˜ di imso_kulom! âska sâ·i_âsa bo. ea, hâiron bâ âmki. lot sta pâTi nâ vo_âsâ âmki. i˜a gija_kâřâ lot gek_kti buna, dü dü âar, dü hu·kumâta˜ sta bomrik Suc_âsa ina. nuriston je âfGonistona Suc_âsa! źâbâ molum âi. â? qumândon molum âi. mujåhidin mâlum âi saňi âske to di molum âi imo sta di molum âi. xu pâs, e âar sta, zarur nâTü bi·samiš. ioa, eTa mânšoa˜ âćti imo to, pâmüc, lâder oastâi. vâre_mumlâ·kât to sta mânša. âgâr âske sta mânšoa˜ sâipa [?] de âmki imo sta duš·mân âi. hâ? duš·mân lâder nâ iela bunta ea duš·mân ea to! zarur, šo to kâca lâder oastâi bo vâra_mumlâ·kât to po·kiston ste˜, hinduston ste˜, urusâ ste˜! kâca lâder oastâi bo de âmkioa˜ sta noma˜ gâćaň! â·kiste˜ šo jeti, šo poar ste˜ hâiât mânša kâca_âsi? jârgâ mânša. âske sta mânša kâca_âsi. â·kiste˜ ketta ketta viri â·ki bâhâs bâ. ketta viri meS šo ina lot peTio. gâćaň sânâta˜_kâřa to sânât nâ_âsa. i˜a gija_kâřo o˜š_kša_âa? šo štâňa_âsaň kti gija_kâřo. viri nâ vo bâ âkiste˜ i˜_to sâip. o i·e to sâip ca â·kiste˜ âmki i˜a vânmi to âmki gija_ku, tü de, nire caň buloš imo care niň bummo kti sâip, ca giti hu·kumâta ni_âveti sâip, âmki mânšoa˜ hu·kumât ni târeao! i˜a âmna mânša, ina tårix to, dâlke˜ gâjâr ˀi·slomi hu·kumât de strak bâxâir, i·poa˜_go. ine to âmna mânša, mâshul âi, âu, ketta mânša hu·kumât to oasa bo, o˜ šü˜ vo bim bo de o˜ i˜ cat to mi kudoanam. âmna mânša âmna mânša küt koř bulâ âkiste. o˜ nâavo [?] mâřam bo, zarur âmki hu·kumât ina lâtri, küt kulâ ca, âmna xi·onât kula mânša, âmna Câa vřâkâla mânša; âmna qoum_to, tâbo·i âvela mânša kâca âi, âmna mânša, âmce˜ sta sâzo to přâvoa sta bulâ. | |
| â·kiste˜ ina viri to i˜a ina, sunti viri mulo âpźâl to, âTleao. mulo âpźâl to i˜a gija_kâřo, tü de mulo_âsaš. ina lot johis_âsa_â? šâriât to, johis_âsa_â? ina xudâia nâ mâNla mânše meS lot koř_âsa_â? kunam bo nâ˜i kti gija_ku. e˜ nâ_âsa bo tua lot kea kâřo_kunam bo, "kombřom mânša, püpü lâsiâ suara imo sta, gul âša sta nâ buna imo oatea˜ mřemmiš_kti, âmki i˜_to pâpaliâ˜, vâpali☠âćnâsi, âmki i˜_to vâpali☠âćanta kti i˜a, lot kâřo kti gija_ku. bes tu sta ina lot, kâřa ste to qo·il_â·ša_â?_kâřa to, "o˜ de nâ_kunâsim âmkioa˜ kâřo kti gija_ku. i˜a gija_kâřo tü de mer_âsaš. tü de strak di kti mer vor to oa·ša. o˜ć âmir_âsa_kunâsaš. ina mâ·suliât sunti tu to_âsa. mujo·idin gija mi_kula bi, i˜_to tâklif vo_âsa kti ea mânša muka˜ de mukana. â? âmki imo to tâklif_âsa kti püpü mi_kula bi. tü de musalmon di_âsaš, mulo di_âsaš, âmir di_âsaš jeS di_âsaš. tua kâa kti ina lot qâbul kâřo. kâřa to âska di jâvop nâ vo. Gâlât bi·samiš. mâgâr Gâlât bi·sam_kti âska âmu sta Gâlâti meS jena to de `di bulâsi [?] sâip. âska âmu sta šâitoni feal tå âxret to vik âskea [?] so tâřo. kobul ste˜ sârvâr oasa to `di âta utařo âkiste˜ âskea. | |
| âni eTa tâbâqâ mulo ketta_âi bo âmna pâ·kât kTol kârea bo âmce˜ jukuřoa˜ e [?] âmu sta [xx]. i˜ sta muloa˜ meS kâla gek düŋe_âsa, nâabo o˜ musalmon_âsam. o˜ musalmon_âsam o˜ biliuk lesta musalmon_âsam. sua˜_to lâtri di i˜a biliuk mâsrâf kâřâ sâip xudâa sta râzo düŋe; Suc di i˜a biliuk kâřa·sa; puNrik di i˜a biliuk mâsrâf kâřastâi; gâtra de o˜ biliuk bi·sam. mâgâr âmkio˜_to kâa fârq_âsa, e dâři oala bâru teti tâzbia˜ vânmati sâip mânšoa˜ pâtioanta! mânšoa˜_to mřâšta nâ_âsa, mânša ina tâmisa ku˜ nâ bânta! âmki gija višanta âmna firištâ âi âmna mâlâkâ âi višanta. hol ina_âsa âmki, ina, pe_kâćti de mânša âi, musalmon âi. âmki pok, šâiton âi. musalmon nâ_âi. [xx] xudâa pâtiala_âsa_â? ca âmki pâtioanta. zohire kudüm kunta; pTipâar vâra=kudüm_kunta. ina lot de âmna mânšoa˜, gita sta Gâlâti meS kâřa·sa. | |
| ina lot to ca â·kiste˜, âźartâli Tâpoa˜_go. âźartâli Tâpoa˜_gu to ca âkiste˜, i˜a je qoum pâmüc, bitifoq ca [?] oaso. âmki gija_ku imo lot kâřa·si i·ea lot peTi·sa, i·a imo sta duš·mân_âsa âmki ca utiala gija_ku; šo imo to nâ kudeaou˜ ina suara hu·kumât to tâslim bi·saň šo suara šoa jâňa sta râvo_âsaň. suara i˜a je šoa bulo kti, i˜a, âska_koř bo sâip. | |
| âmki ca utinâ sâip. i˜a gija_kâřâ šo ca utiaň o˜ duš·mâna pe utela nâ_âsam, šoa lot kâřa sta bo kti sâip. vićâ duć âaTi meS giti târti kuN gom sâip. kuN hu·kumât bâři·sa [?] âska vel to sâip mânša! vićâ duć mânšoa˜ meS o˜ â·ki kâa_ku˜ bânam. i˜a kâa câl kâřo sâip. ni_giti u_giti kuN pâkTle bâdo pâřim_to sâip â·kiste˜ âmki âaTi tre to bâTa_kâřâ sâip. duć de kuN bâdo, bâkul âtaň, bâku, care niň âćaň kti gija_kâřâ. duć moc. duć moc bâre pâšaŋar âtruk u pânoř, nâ_âsa_â? â·kü pânoř â·kü üm dâiâ. bâdo ste. šo bâre âta_âćaň [?]_kâřâ. šo gek_kti dâdü iâionâřik biti suara, âta_âćaň. âmna mânša purjalâ ca, âni, biliuk mânša oastâi kti. o˜ć e nu duća˜ meS sâip, â·kü STâle˜ ü_giti břâkom bâra nsala bom âkiste˜. e pâTi streati nâmiâ suara i˜ meS puc sât moc mujo·id oastâi; suara dü_Sâřa goa˜ jâňati buTi tâior kšaň kti. e pâTi streati břâkom nâmio kuN. | |
| âmkioa˜ o˜š kunam bo bâre, dü_Sâřa go, goa˜ jâňati sâip, juS kummiš kti_âsâ sâip âkiste. â·kiste˜ pânoř bâra nsiom â·kiste mujo·idin kor âi? kti i˜a gija_kâřâ mujo·idin kâca âni care pânoř poar, ni âćanta kâca bâre_âta_âćanta. âmki pâřuc_vik, cuk âćla_âsala bo, ea_âźor âćnâlla_â? cuk_âćnâlla bo. tre što puc sât mânša de i˜a meS oastâi kti gija_kâřâ; suara âćanta kti gija_ku. âska â·kiste˜ âska řâdor bâra_giti bâre vilâiâlla â·kiste. âloqâdor puc âźor mânšoa˜ meS oa·sa âtre âćti kuN jeno. âmkio˜_to bâre vidařik ca lâsio [?]. | |
| âskea pe ute sâip. âkiste˜ i˜a kuN přeati sâip âkiste˜ âmki caň mânšoa˜ düŋe `di pâTi ca pto? [?] nâ tino i˜a [?]. ni âćaň ina hu·kumât meS Suc_kšaň âgâr nâ_kunaň bo â·kiste˜ šo meS di kunam_kti. | |
| âmki vos_âsi sâip ca â·kiste ina, mâ·sut nâ_âsa_â? ina strak pân·šar qumândon. ina, âni, pi·šâvur ste˜ sâip mulo, ustoz râbonia, e pâTi přeti nâmi·so i˜ düŋe sâip. i˜a âska râboni âni vâňi sta bo nâ˜i â? Sâŋe? ina i˜a â·ki tu to nâmio, ina â·ki ca vos tu meS ina, Suca o˜š kulo Suc to řâmbulo kti, pâTi přeti nâmi·so âska. i˜ meS â·ki e dü vići vos de â·ki, â·ki bo ina, pâSuc to ninša oaźio. i·a mâ·sut i˜ sta_âsi âmkio˜ pâmüc lâder bo âkiste˜. ou˜. | |
| i˜_to i·a mâ·sut âćti i·a biliuk kšüla_âaTi i˜_to TüTü pto, tü, âmki tu pursta sunti, erâŋ sta mujohit, bu˜ nâ bânta. in·son tâfâ·ut, vo âi. eTa vidařala bunta eTa nâ vidařala bunta, eTa kšüla bunta, eTa câTa bunta. âmki mânša ina viria nâ źâňanta, tü âmkio˜_to koTe˜ koTe˜ vâllâiš bo âmki vidařati tu to tuare˜ nâ âćanta, tü âmkio˜_to cala viri vâllâ kti gija_ku. tua, pâTi stroala bi bo âska mulo, âmna muloa˜, o˜ muloa˜ düŋe biliuk Dâkara kti stroanâsim. šo mulo, din vře˜c kula šo gita sta, šo hu·kumât meS, kâ·pare meS vâllâla kti pâTi stroanâsim nâ˜i â? tua â·ki tua pâTi ca pta·sa o˜ vâňio_kulom [?] âmki tu to tuare˜ nâ âćanta kti gija_ku. tü eTa cala cala pâTia˜ streati gâć o˜ć âmkioa˜ giti ârizo [?] kti âvelom_kti sâip. dü vor pâTi vřâkâti kuN ste sâip âska ca go sâip. âskea ca giti evor što sât mânša, âkiste˜ i˜a düŋe âvařâ âkiste. cala viri pâTi streati ca pta to âkiste oasâ âkiste. | |
| kuN oasa to mujo·idin âkiste˜ âmki, imo sta mânša de nâ mi oasta_âsi sâip, i˜a â·kiste pâTi streati nire nire â·ki dâŋgom bâkul vik, pâTi streati âmna sunti bâkul ninša mânša vâlleo! âmna niň mânšoa˜ de âkiste âska, âmce˜ i·a lâjori ca gu sta âske to pi·šâmon bâ âkiste. vidařiâ âmki, ina utro nuristoni bo [?] de ina mânša nâ dreao; âmna nuristoni âni ni âćti strak imoa cur kunta kti sâip evor âmkioa˜, âmkio˜_to tu ptri [?] ca lâsio sâip. sunti oasâ sâip. ketta mânša i˜a nom_târa sta_âsi bo, âmki sâip âćti â·kü kuN, vâsaŋařastâi. dü tre_Sâřa go jâňati sâip â·ki_âmki dü tre vos vâseati sâip âkiste i˜a, âmkio˜ meS, e mohâidâ imso_kâřo. ketta mânša suara imo to ca oastâi bo, kua jâňi·samiš bo luSi·samiš bo âmki âfâ_kâřâ i˜a kti gija_ku. kâca di šo meS nâ ˀi·sop vo âi nâ kitop vo âi nâ kâca kâa vo âi o. ea šârta i˜a šo meS âsa ca šo fâqât sâno kti imo meS lâTea˜, ina hu·kumât to pâpalia˜ guň bo. pâpalia˜ nâ iela mânša kâca bi bo âska mânša o˜ć âz bâin gâanam. kti âmki pâTi přeti sâip, hâr gřoma˜ düŋe sâip, pâTi přeti šo âfâ_kâřa·saň kti, fârmon přeti nâmiâ sâip âkiste. | |
| â·kiste˜ i˜a gija_kâřo o˜ć, care ste mujo·idin ni oasa bo, o˜ć â·kiste, sin dârâ to âćlom_kti ca. vâdâ přeti ca âmki ni nâmiâ! ni nâmti sâip â·kiste strak sin dârâ to gum bo âmki i˜_to gija_kunta âmkioa˜ i˜_to gija_kunâsi, tü ni âć, â·ki tü imo sta jeS buloš, â·ki imo Suc, tü kâroaloš. imo nâabo io pâmüc viri nâ ŋâti imo Suc nâ_kummiš. ina ev ev âcea˜ ššeati. tü ni oa·ša bo ina buna_kunâsi i˜a gija_kâřâ o˜ć â·ki de, ni âćti o˜ šo meS bu˜ nâ bânam biliuk vos. i˜ sta pârmaň câlti gustâi püre â·ki âi; o˜ć â·ki caň, â·ki niň düŋe mânša vo_âsam. kti gija_kâřâ. kâca_âsa kti gija_ku Gosi xon imo sta břo â·ki niň, âsa šo meS; âska â·ki šo meS gul di šârik vo_âsa, âskea_â·ki vâlloalom âska šo meS bulo. | |
| pâTi ca přeti sâip, dü vići_vos o˜ kuN bom o sâip. âmna mânšoa˜ nâ ni višti. i˜ cat to âmki vićâ duć âaTia˜ meS. âmki oakuNi vâlleati vidařeati âmkioa˜ âni nâmti ca âmkio˜ poar sta de i˜a, xåtar jâm bom; âmki i˜_to nâ liSTanta kti nâ˜i â? | |
| âmki oakuNi oasa to kâa_kâřâ i˜a âmki i˜ sta âaTi. âmki hâr kStuka˜_to sâip dâdü mânša tâpkoa˜ u_kâćeati jena sâip â·kiste˜, suara de sunti â·ki jâbâ to Suc to nâmistâi âmna, âni, âmniât düŋe nâceastâi kti. âmki gija višiâ [?] utro STâle˜ ine meS puc âźor mânša âi âni. âr kStuka˜_to âmki e tâpka vo âi bâ? gija višiâ ca ina źâŋgâl to âi ne. ine sta mânša. âta biti buň_kâřastâi i˜a âmna bâmbori_kunta âmna hu·kumât nâabo suara, mujo·idin sunti, pâpor [?] kâřü gustâa kti gija_kâřâ i˜a [?]. âmki gek_kti vidařeaâ. | |
| bil åxeri mâ·suta ca giti âmki mânša ni âvařa to, â·kiste ca, Gosi břok di oaso. ni giti, gâNür gomiš âip. gâNür giti gâNür ste˜ ni_giti ni_giti ni_giti jâlolâ di ptomiš o sâip. norâi tâkbir, âska, benâmos bi dunio sâip di, âska_kâřo sâip. giti, bârgom giti sâip, pârea mânša vâsaŋařeaâ âkiste. pârea mânša vâsaŋařeati, lâmbâr iâk fârmon âkiste˜ i˜a sådir kâřo. lâmbâr iâk âkiste˜, nâ˜i de tubo, vâ·sa, fârmon âkiste strak Gosi âmir kunam nâ˜i â? ni_giti bârgom gomiš â·ki, pâSoa˜ vâsaŋařati gâis· ü teti gâjâr imoa bâmbâri_kunâsi sâxta. řâdor gâi·sa ü teti sâip âska, Gâmxur sta box to. e qånun streao i˜a âkiste. ina âmonât sta qånun ina ea âmir bulo âmir sta ea måvin bulo â·kiste tâškilot i·peati ca, â·kiste˜ Gosi břok de âmir kâřo; â·kiste âske meS ca teti ea qumåndon âmniâ_kâřo ea qumåndon e jâhot kâřo ea gek kum âska tâškil i·peati ca, âmki oakuNi nom_teti. quron_to šüt kâreati sua˜. imo di xionât nâ_kummo imo břâźo_âsamiš nâ nuristoni_kummo nâ gujar_kummo nâ sâtra_kummo, ea břâźo bomiš, Suc kummo kti ca âmkio˜_to, âska lâtri pâa tâveati [slap sound of seal] pâa tâveati ca, â·kiste˜, strak pâSuc, âska_koř buna [?]. | |
| â·ki de turća˜ turća˜ viri de biliuk âi, suara âmki viri de, qåbil de ina lâtri to źi·kar koř nâ_âi; ina imoa i˜a je tu sta viri de bâdriŋo enta; kitop de biliuk oala i·poa˜ elo âkiste tu to di bor voňa âćlo, xulo·sâ viri ina_âsa ca˜, ina dârâ e sin, imo, i˜a ie sta [?] i˜ sta mujo·idina˜ ie sta, nuriston mânšoa˜ ni [?] ie sta, ina biliuk kâTavo tå·sir kâřo âkiste. i˜a ni giti â·ki, jâlolâ ni pře sta, mânšoa˜_to egek tå·sir kâřo sâip ca˜, nire âs·mor livo sta qumåndon, musalmon_âsi âbdurâ·uf nom vo mânša, âske to di hâq [?] pâido bo [xx] utro musalmon STâle˜ ina jâhota kunâsâ kti. | |
| â·kiste˜, ea źâ˜vor sâip, ea vâsut ste˜, gâati to sumbulâ to vik puc mos o˜ć â·ki dârâ, o˜, pâmo nâ gom. â·ki ninša bom. nâři âtam oaźu, nâři inâar ca âćti, gâNür ste˜ ca âćti âtam oaźu, pere, pere âćti âtam oaźu, âćti care dukuliom, vâa_kâćeati â·ki berkuT u via, âni ninša jâhot ku˜ di [?], puc mos â·ki bom. i·a Gosi meS â·ki ninša lâsti, kudüm kâroa˜ di [?] mânšoa˜. | |
| âmna mânša, vidařanâsi, imo mânšoa˜ vâňati, âmna imo to vâpili☠âćanta kti. âmnoa˜ ina, råbitâ, lesta_kulom âmna, ina, i·a âsaka hu·kumât de ku·šaš kunâsi âmna, qoum bâ qoum mânšoa˜ kâla_kâreati âmu sta vâxt tâvâ·sir düŋe nâ˜i â? i˜a ina kudüm_kâřo ca, tu sta de âmna prugrom; i˜ sta ina prugrom_kti ca˜, o˜ć hâr gřoma˜_to giti gija_kunâsim, imoa bâkci·saň, šoa nâ źâňati_kâřastâi, ina šoa qâsdi nâ_kâřa·sa, šo vidařati_kârea·saň, šo to kâca di kâa mâNla nâ_âi. šo imo sta břo_âsaň. kti sâip âmki, â·kiste ina jâhot to gâati âtam_kâćeao! | |
| â·kiste niň poar sâip ina, kombřom ca utino, âduka bo. viri niň šuru_kâřo âkiste. i˜ sta ina viri nüštruk i˜a kâřa to, nâ_kâroa˜ ienâsa kâmkuř. ina imoa â·ki nire bândi bi·sa hu·kumât meS vâllâti â·ki niň â·ki bâjâňato˜ gâana kti nâ višiâ. nâabo nüštruk ni âćti Carat niSo ni_Tikim_to i˜a gija_kâřo dućći moc i˜ meS âćaň; ina kâlea gâati ni gâati pâriS âtam oaźammo; â·kü ninša, imoa ina lâtri nâši bo, ina kâla â·kü ninša ubajana mânša âkiste, imo co [?] šo sük io sta âtacbâra [?] ieloň_kâřa to, i˜ meS nâ višti sâip. ina imo to tâlâfot, i˜ sta viria nâ ŋâti mânšoa˜ âska_kâřo. xu sâr âz u di [xx] imo mânšoa˜ sta ina šåhâmât, ina imo mânšoa˜ sta źâra vo vor, i˜a vâňi·sa. âskea vâňati biliuk, xu·šol_âsam, mâgâr strak kâa? Tâŋoa˜ pTipâar_ienta. âmkio˜ sta isât, pTipâar nâ ienta, o ine to xâ·pu_âsam. âska lâtri i˜_to bâźare uja biti, ina qoum_to, qoum_âsam_kunam nâabo ina qoum_to ste de mun·kir bu sta_âsi. ou˜. | |
| Suc nire sâip, biliuk kâTavo kâTavo Suc bâ âkiste˜ â·ki. niň. e vor, nire, nâři âtam oaźiomiš sâip nâři âtam oaźti, ea kânDâk imoa, nuristonia vino. ea kânDâk oakuNi je sâtra e sunti bâTa biti, qoum bâ qoum giti, â·ki pâa_kâći·samiš. viammo kti. o˜ de peň poar_âsim âni inâar sunti imoa bâTa kti jea·si âaTi. nuristonia vino âska. suara tuare˜ mi nâ dreaâ â·ki. imoa je âmnoa˜, ina lâtri, âska_kâřa·sa o! målum bi·sa imo je âmno˜ sta ina lâtri ne? źâravovor. ina Suc to. imo mânšoa˜_to přeati kâca di, źâravo nâ_âi. źâravo imo mânša âi. e xu â·ki bâdo ca utina sta biti, ina, źâra kâSaň [?] vo âi. bâboźor vo [?] _âsa bo źâra, kâSaň vo. bâbun ić! bâbun nâ vidařanta de kâia˜ vâňati. ou˜. | |
| â·kiste suara dâfâ sâip nâři âtam oaźiomiš sâip. nâři âtam oaźti sâip, ea kânDâk â·ki vino sâip. suara dâfâ, xu ca, âska, ea vâsdor imoa, ca dâfâ sâip â·ki hâmlâ_kâřâ âmki hâr hâmlâa˜_to, ea hu·kumâta, kâa de nâsuř peToanâsamiš kâa, damaři peToanâsamiš, kâa e gotr peToanâsamiš, ea âar cuřea viati ca˜, ca oaźti ienâsamiš. vâre imoa nâ kâca punrik přenâsi nâ kâca kâa přenâsi. fâqât âqamot, [?] imo sta kâmol ina_âsi ca, kuiu e to âtam oaźti vina to sâip â·kü e_sâma lâtri bâdüšt_ienâsi âmkio˜ meS sâip. [laugh] â·kiste˜ di, Suc ku ste zâminâ bârâbâr bunâsi. ou˜. | |
| niň dârâ e sin_to, Suc di biliuk nâ pâmaSTa˜ iela Suc âi. biliuk lesta kâTavo kâTavo Suc kâřâ mânšoa˜. xu·su·sân imo mânšoa˜ biliuk, kâTavo kâTavo kudüm_kâřâ. âmki kâca âi? imo mânša. vili_gal sta, imo mânša. cu·kea sta. suara, â·kü mâret sta. âmna nire Sârgal sta. suara, ćünuk sta de imo meS caň, mu·âjar bi sta_âsi. âa, ca âćti mâCimon, šâŋir. xu·su·sân âkiste âmna mâCimon sta, vâňi je šâŋir vâňi e, imo sta qouma˜ pâmüc ina, gâNürio e. ina qurboni pta·sa inea kâca di pře˜ nâ bânta. âmna cuk saři âni pâSuc âćnâsi bo âmkioa˜ âmki buTi přenâsi. gâNür poar ca âćla saňi ketta_âsi bo âskea gâNürio buTi přenâsi; inâar šâŋir poar âćla kâca_âsi bo sâip âmkioa˜, sunti šâŋirio je, mâCimon sta přenâsi. ina jâhot, âgâr i˜a gija_kâřa bo ina merak dârea˜_kâřa·sa_kâřa bo de. â·kiste, di gija_kula [?] ca˜, ina suara, âmu_šü˜ u_gâana_kunta. i·ea di nâ_kulo. mâgâr, imoa, i˜ sta totbřoa˜, ine to, biliuk ˀi·sâ ŋuta·sa. ina ilât ina_âsi ca, o˜ pânüš bi·sam nâ˜i â? o˜ pânüš bi·sam gek düŋe. ina, ina imo sta břo to imo bisât nâ bummo ina, âni jeS biti oa·sa kti sâip, âmna sunti, âmna kâa qurboni přenâsi bo xudâa düŋe_âsi, mâgâr i˜ sta, âcea˜ o˜š_kti kunâsi. | |
| â·kiste sâip, [xx]·si i·a pâmüc u sâip â·ki bâre nâři, ea dâfâ âtam oaźimiš to sâip, â·ki imo nu duć, [dut, with following juncture] mânša mujo·idin di mâřâ kâca tre što puc âni caň imo sta mujo·idin di mâřâ. tâbiât xârop bo âkiste âmki i˜ sta tâbiât to âaTi sunti âip, âmna, bâ·sano mul biti âip, kâca buTi kTol, lesta nâ přeti sâip, eTa vor bi to, âmki, imo bâdriŋo bunâsamiš nâ˜i â? â·ki di jukuř pârmaň âni ŋe [?] u_gâati bâdoa˜ bâřa·si sâip, buTi pâa_âšala kâca nâ biti nâabo âmki imo totbřo sâip, gâS di Sâřa di âveti utea·si. gâS âno nâ iummiš, kâřa to âSea˜ jâňanâsi, âSe âno nâ iummiš kâřa to gâSa˜ mânâsi. âmkio˜ düŋe nivo mâňoa˜ ure â·ki sâip, â·ki bâdo ste sâip nivo mâňoa˜ âvenâsi imo sta âaTia˜ düŋe. imo, âno bâTa nâ iummiš imoa u štoana, top_âsa kti. imo düŋe nivo vřâk☠[?] to ste giti bâbun ste sâip, mâňoa˜_to ste imo düŋe nivo âvenâsi. ina qurboni_âsa ca. inea kâca ku˜ bânta â? âmna, ina e jâsbâ vřâkâna. sunti mânša, vâre di ke? nâ_kunâsi â·ki mu·šuâNi di kor Sâřa vo_âsi mânša_âsi lâtri_âsi, mânša, qoum_âsi. âmkio˜_to ina kudüm nâ_âsi. âmki di âćti imo buTi iunta imo to ca_kâćti. ina gita sta mânša_âsi. iå kuiu poar vâre˜ sta kuiu xâirâti buTi âvenâlla â kti ca âmki o˜š kunâsi. mâgâr imo mânša gita sta nâ_kâřo. imo mânšoa˜ biliuk, imât kâřo. | |
| â·küste, âska vâsdor ter biti ca˜ sumbulâ bi to puc mos pTipâar sâip o˜ â·kiste˜, hâmâl to gu·sim. âvâl e hâmâl to pü târi·sim; âni, nâŋar ste. ou, âvâl e sumbulâ, â·ki oasom sâip. puc mos fiks, i˜ sta, â·ki ter bâ. hâr dâfâ jâhot to gum_to, âska i˜ sta cok vos de tre mos bunâsi nâabo što mos puc mos, što mos puc mos â·ki bunâsim. o˜ giti mânšoa˜ mujo·idin âveti sâip, nâři poar bâra âćti âmna nâřioa˜ meS vâllâti, nâři de tâslim_kulom, suara, ina hu·kumât âni ste˜ ni târoammo višti [xx], berkuT u de nire caň, muhå·sarâ_kummo kti. | |
| âćti nâŋar oa·sim de âkiste o˜š kunam bo â·ki mânša caň, mânša ˀitifoq bummo, kti mânša vâsaŋařistâi tu düŋe âri oa·samiš_kti sâip mânša oasâ i˜_to! ea mânšoa˜_so nire o˜ mujo·idina˜ nâceati oa·sam â·ki Suc_âsa â·ki âska_âsa ina strak vâll☠viri nâ_âsa, Suc vel_âsa. de i˜a, biliuk kâřâ xu. [xx] ste nire pâšiŋar imo ćüř di sâip, xudâa bâkcalo ure kâmaron nâ_âsi â? âska. suara i·a i˜ sta nânbřo âja âbot kon bulo, âska i˜ sta mâjam_tot pütras ˀis·moil. tre što puc, sunti mi oala oala kâšara_dâři âi_âsi [?] nâ˜i â? âmki. âmki âćti pâmo jenâ suara tü zârur imo vâllea·saš qouma˜ suara, tua ie sta buna kti gija_ku. ea˜ mâjbur biti âkiste˜ pü ššiom âkiste hâ. trić vos â·ki vâsaŋařati sâip âmna mânšoa˜ sâip, ina, inea_kummo inea_kummo, faloni jeS bulo [?] tâškilot i·poammo. imo ina jâhot sta jeST, målum_kummo gita_kummo suara_kummo kti bâlla âmki. kombřom vâllâti sunti âćti, piti_gal vâsaŋařistâa, se kombřom sta di sâip, pâcoguli di sundi. | |
| [R] â·ki vel to kombřom kâca bâ? saňi_âsi â? | |
| [A] nâ˜i nâ˜i. kombřom de imoa ni toř_âšio nâ˜i â? âska ni toř_âšti âska vâsdor. ni toř_âšio, âska vâsdor sâip, â·kiste˜ âmki âćti â·ki vâsaŋaři sta bâlla. o˜ de bâkul ni bom nâ˜i â? puc mos i˜a â·ki bo. suara âmna caň mânša suara imo sta âaTi, imo sta mujo·idin, nuriston sta sunti niň bunâsi i˜ meS nâ˜i â? tre što sât mânša, i˜ meS vâsdor niň bâ â·ki. suara pâta bi sta, âćti âni bokcâ to ste˜ berkuT u ina kumari_gal je kuN bâra_kâćti, hu·kumâta vianâsi berkuT. âtam u tea·si. | |
| â·kiste, ea˜ o˜ mâjbur biti sâip âmna mânšoa˜ meS sâip, piti_gal gomiš o! piti_gal iemmiš bo sâip, trić_vos âmkioa˜ â·ki jârgâ kti, â·kiste imo düŋe nâcea sta bâlla âmki de oasa bo sunti, kummo kti. viria˜ [?] vâllâti. â·kiste pü ienam bo âkiste i˜_to gija_ku tü imoa, âska_kâřa·saš. qumondon_kâřa·saš_kti gija_ku. i˜a gija_kâřo qumondon de o˜ giâ˜_mi_âsam â·ki i˜ cat to, Suc kunam â·ki, âsam. šo de âni_âsaň o˜ć â·ki_âsam. o˜ qumondon qumondon nâ bunam o˜ přek mânša_âsam i˜ sta pârmaň de turća˜ âi. o˜ć, ina xudâa düŋe jâhota kuiu bâim bo kunam; nâabo nâ_kunam_kti nâ_kâroa˜_gom sâip. liSTiâ sâip sunti i˜_to sâip. tü kâakti qumondon nâ bula bunša suara tu düŋe, ina kudüm nâ_kunša bo tü, lea mânša nâ_â·ša bo [?], tü imo štâňa_â·ša o qoum, qoum tü gita_kunša o suara_kunša. e˜ mânšoa˜_so i˜a nâ kšaň o˜ dâlke˜ šoa vâňati jâhot kâroanam. â·kiste di i˜a Dâkara_źâňanaň. šo imo mânšoa˜ sta ina qoidâ_âsa ea mânšea pânüš kula_âsaň; â·kiste âskea pTipâar, pü teti, nuŋ ćioala_âsaň [?]. o˜ć ina kudüma nâ_kunam šo düŋe. xu, kâa kâřo, kâa kâřo âmna sunti jeS mi jeS de vâpali☠âćti sâip. tü de qumondon Suc sta imo sta boš_kti gija_ku; mulo rustum imo sta åmir bo kti gija_ku. | |
| ina kea_kâřa·sa šoa kti i˜a kudoa sta bâ âkiste. tü je mulo rustum pâmüc â·ki ptul kâSkoS_âsi šo ecok bitifoq_âsaň. šo oadü lâTea˜ ina lâtri to biň bo ina lâtri di, ina břâźo vor pâido bulo; suara imoa gek düŋe_kâřa·sa kti gija_ku. i˜a gija_kâřâ ina i˜a qâbul koř de nâ_âsi kti gija_kâřâ. gek düŋe mulo rustum nâ mujohid_âsa nâ tâpka bâru˜ te˜ źâňala_âsa nâ kâi_âsa. i·a de i˜ sta jeST, o˜ć i·e sta qumondon i·a kâakti buna? â·kiste mânša TüTü ptâ i˜_to biliuk. [xx] i˜a pi·kar kâřo, ina sâ·i_âsa, i˜ sta mâ·suliât cok bulo, i·e sta šaTe˜ bulo višti. | |
| â·kiste, qâbul_kti giti gek kum giti kombřom gomiš âkiste. pârea, pâcoguli. se pâcoguli âmna sunti vâsaŋařati di giti kombřom gomiš. kombřom giti sâip, mulo rustum vâlleao âkiste. mulo rustum nâ oa·si â·ki. âske to mânšoa˜ gija_kâřo imoa gita kti fâi·salâ_kâřa·sa kâa, mâNanša_kâřa to âkiste, sâ·i_âsa kti kušol bo âkiste! âćti â·ki i˜a vâlloň oa·sa â·kiste, pâSoa˜ i˜ meS biti "pâřuckol i˜ sta vico_âsaň kti gija_ku. âvâl gâjâr pocetr_âsa, pârea kâmkuř âskea vico_kâřa·samiš âmna muhåjar, ü târi mânša, âska pâSoa˜ de â·ki, iâ·kup nom vo i˜ sta e leavâllâla âskea, go jâňati bâjuSânua kti, štra [?] ptâ mânša. umoňasa i˜ sta vico_âsaň kti_gija_ku. âska juS to, âska, mulo rustum. âkiste umoňasa â·ki ni giti, âska, â·ki, iemmiš_kti imo sâmaři·samiš pâřuckol mânše to gija_ku [?] mulo rustum de mukti gu·sa kti gija_ku âkiste. mukti gu·sa kti gija_ku. "kea mukti gu·sa_kummiš bo de "muki·sa kti gija_ku. âni eTa mânšoa˜, liSTati âska_kâřa·sa kti gija_ku. "kâca mânšoa˜? âni, dâ·ut. dâ·ut nâ_âsa_â? dâ·ut nâ_kunta_â? eTa, źâňanša_â? âska urbřom dâ·ut. âmki dâ·ut kiloa˜ âske to liSTati suara tü je ou˜, tü de âloqâdor meS de imoa duSmâni_kâreati, strak tü de mer bula âska de tu sta munâsir bula, suara, imo dâlke˜ přâmi Dun âšoaloň. vâllâ âgâr tua imo pe utemmo bo, gita bummo suara_kummo kti vidařati âska bâřa·sa kti gija_ku. iå. âska nâ de âska vicaSoa˜ bo âske bâdüš nâ di kâa bo sâip â·kiste mukio sâip. | |
| ea˜ muki to âkiste˜ sâip mânšoa˜ vâsaŋařati sâip, Toŋ dâstikar âkiste åmir kâřo. Toŋ dâstikar åmir kâřo âkiste. | |
| â·küste ca˜ âska mulo rustum bâra_giti mukti giti sâip gulbudin_to âćti âni sâip přâmi vâňeati sâip, ina, pârea břâźa qoum_to âvařo! â·ki vik inâar ina, nâ mânšoa˜ źâňanâsi kâca nâ kâi_âsi nâ kâca kâi_âsi. â·kiste, gulbudin de šoa źâňanâsi? gulbudin de âmna gita sta lâtria˜, ina břâźea xudâa to vřâkânâsi. â·kiste i˜a, xudaâ to vřâkânâsi ca i˜ sta muqobil to e muqobil dâ·us [?] â·ki vik de, kuiu put nâ vâňâti_âsi â? âska. â·ki ste mulo rustum sâip, kâca tâpka přeti kâca, jal přeti kâca kâa přeti sâip, âskea pâteati sâip âveti â·ki imo to e břâźea pâido bi[xx]. câkcala âmkioa˜ břâkźa imoa ina viri â·kü vik nâcoa. |